મારા સાયબર વિશ્વમાં આપનું હાર્દિક સ્વાગત છે.........

પ્રિય મિત્રો,
આપ સૌ મારા બ્લોગ પર અવારનવાર પધારો છો તે મારા માટે ખૂબ જ આનંદની વાત છે. પણ ઘણા મિત્રો તેમના અભિપ્રાય આપ્યા વગર જ જતા રહે છે, જે મને થોડું અધુરૂં લાગે છે. આપ સૌના અભિપ્રાય મારા માટે ઘણાં જ અગત્યના છે અને તે મને કંઈક વધુ સારું કરવાની પ્રેરણા અને ઉત્સાહ આપતા રહે છે. તો મિત્રો આપ જ્યારે-જ્યારે મારા બ્લોગની મુલાકાત લો ત્યારે આપના અમૂલ્ય અભિપ્રાય આપતા રહો તેવી અપેક્ષા.

સૌ મિત્રોને નમ્ર વિનંતિ કે અહીં મુકેલી રચનાઓ માત્ર સાંભળવા માટે જ છે, આથી મહેરબાની કરી ડાઉનલોડ માટે પૂછવું નહીં. આભાર.
મારા સંગ્રહમાંથી કેટલાંક આલ્બમના મુખપૃષ્ઠો:



શુક્રવાર, 27 ફેબ્રુઆરી, 2009

તારા વિના કશે મન લાગતું નથી

શબ્દ : મુકુલ ચોક્સી
સ્વર : રૂપકુમાર રાઠોડ, સાધના સરગમ
સંગીત : મેહુલ સુરતી

તારા વિના કશે મન લાગતું નથી
જીવી શકાય એવું જીવન લાગતું નથી

પોતીકા થઇ ગયા હતાં આ વૃક્ષો ને ખેતરો
ને આપણા થયા’તા નદી ને સરોવરો
એમાંનું કોઇ સ્વજન લાગતું નથી.
તારા વિના કશે મન લાગતું નથી

અટકી ગયેલો એકલો ઝૂલો બન્યો છું હું
જાણે પરાયા દેશમાં ભૂલો પડ્યો છું હું
ખુદનું વતન હવે વતન લાગતું નથી
તારા વિના કશે મન લાગતું નથી.

સપનાં ને પાંપણે સજી આંસુથી ધોઇએ
બસ આવતા જનમ મહીં મળવાની રાહ જોઇએ
આ જનમમાં હવે આપણું મિલન લાગતું નથી
તારા વિના કશે મન લાગતું નથી
જીવી શકાય એવું જીવન લાગતું નથી

મંગળવાર, 24 ફેબ્રુઆરી, 2009

વાલમની વાંસળી વાગી


સ્વર-સંગીત: અચલ મહેતા

વાલમની વાંસળી વાગી, મારા વાલમની વાંસળી વાગી;
જમુનાજી જલ ભરવા ચાલી, ત્યાંતો વાલમની વાંસળી વાગી.

મારગડો મેલ અલી જાઉં વનવાટે, કા'નો જોવે છે મારી વાટ;
નજરું ચુરાવી સહિયરની હું તો, આવી છું તારી પાસ.
જમુનાજી જલ ભરવા ચાલી, ત્યાંતો વાલમની વાંસળી વાગી.

હૈયામાં જાગેલા મોહનના મોહને, કેમે કરી ના સચવાય;
બેડાં મેલી ઘેલી દોડી વનવાટે, બહાવરી બની હું તારી કાન.
જમુનાજી જલ ભરવા ચાલી, ત્યાંતો વાલમની વાંસળી વાગી.

સોમવાર, 23 ફેબ્રુઆરી, 2009

ઊંચી મેડી તે મારા સંતની રે

રચના : નરસિંહ મહેતા
સ્વર : હંસા દવે

ઊંચી મેડી તે મારા સંતની રે, મેં તો મા’લી ન જાણી રામ.. હો રામ..
ઊંચી મેડી તે મારા સંતની રે, મેં તો મા’લી ન જાણી રામ..

અમને તે તેડાં શીદ મોક્લ્યાં, કે મારો પીંડ છે કાચો રામ,
મોંઘા મૂલની મારી ચુંદડી, મેં તો મા’લી ન જાણી રામ.. હો રામ..
ઊંચી મેડી તે મારા સંતની રે….

અડધાં પેહર્યાં અડધાં પાથર્યાં, અડધાં ઉપર ઓઢાડ્યાં રામ
ચારે છેડે ચારે જણાં, તોયે ડગમગ થાયે રામ.. હો રામ..
ઊંચી મેડી તે મારા સંતની રે….

નથી તરાપો, નથી ડુંગરા, નથી ઉતર્યાનો આરો રામ
નરસિંહ મહેતાના સ્વામી શામળા, પ્રભુ પાર ઉતારો રામ.. હો રામ..
ઊંચી મેડી તે મારા સંતની રે….

રવિવાર, 22 ફેબ્રુઆરી, 2009

ના, ના, નહીં આવું

સ્વર : લતા મંગેશકર
સંગીત : દિલીપ ધોળકિયા
શબ્દ : હરીન્દ્ર દવે
આલ્બમ : એક રજકણ સૂરજ

ના, ના, નહીં આવું, મેળે નહીં આવું,
મેળાનો મને થાક લાગે;
મારે વહેતે ગળે ન હવે ગાવું,
મેળાનો મને થાક લાગે.

ક્યાં છે વાયરાની પ્રાણભરી લ્હેરી ?
ક્યાં છે નેહભર્યો સંગ એ સુનેરી ?
ક્યાં એ નજરું કે જેણે મને હેરી ?
સખી, અમથું અમથું ક્યાં અટવાવું,
મેળાનો મને થાક લાગે;

ના, ના, નહીં આવું, મેળે નહીં આવું,
મેળાનો મને થાક લાગે.

એના પાવાનો સૂર ક્યાંય હલક્યો ?
એનો કેસરિયો સાફો ક્યાંય છલક્યો ?
એના હોઠનો મરોડ ક્યાંય મલક્યો ?
કહો એવા વેરાને કેમ જાવું,
મેળાનો મને થાક લાગે;

ના, ના, નહીં આવું, મેળે નહીં આવું,
મેળાનો મને થાક લાગે.

શનિવાર, 21 ફેબ્રુઆરી, 2009

આંસુને પી ગયો છું

"પ્રીતનાં ગીત"ની 100મી પોસ્ટ
શબ્દ :હરીન્દ્ર દવે
સ્વર-સંગીત :પુરુષોત્તમ ઉપાધ્યાય
આલ્બમ :ઈર્શાદ

આંસુને પી ગયો છું મને ખ્યાલ પણ નથી
એક રણ તરી ગયો છું મને ખ્યાલ પણ નથી

તમને ભૂલી જવાના પ્રયત્નોમાં આજ-કાલ
તમને ભૂલી ગયો છું મને ખ્યાલ પણ નથી

મારું સ્વમાન રક્ષવા જાતાં કદી કદી
હું કરગરી ગયો છું મને ખ્યાલ પણ નથી

કંટકની માવજતમાં અચાનક ઘણી વખત
ફૂલો સુધી ગયો છું મને ખ્યાલ પણ નથી

વાતાવરણમાં ભાર છે મિત્રોના માનમાં
હું શું કહી ગયો છું મને ખ્યાલ પણ નથી

શુક્રવાર, 20 ફેબ્રુઆરી, 2009

ડેલીએ આવે તો બારણું યે વાસું

શબ્દ: પ્રજ્ઞા વશી
સંગીત: મેહુલ સુરતી
સ્વર: અનિતા પંડિત

ડેલીએ આવે તો બારણુંયે વાસુ પણ સપનામાં આવે તો શું?
સ્મરણોની હેલીને ક્યાં કોઈ લગામ એને નાથે તો બસ એક તું…

આંખોમાં જ્યારથી મેઘધનુ કોર્યા એ રંગો હથેળી જઈ મ્હોર્યા,
કમખા ને ઓઢણીની કોરે ચીતરેલા મોરલાં ઓછા ના ટહુક્યા;
કુમળા એ અવસરને એમ થયું જાણે કે સોળ વરસ બાથમાં ભરું…
સ્મરણોની હેલીને ક્યાં કોઈ લગામ એને નાથે તો બસ એક તું.

હોઠો પર વાસંતી લાલી ફૂટીને ગાલો પર આવી ગુલાબી,
હૈયામાં ઉછરેલ સૂરજમુખી કરે રોમરોમ રણઝણની લ્હાણી;
મોસમની જેમ તું આવ-જા કરે ને મળે શ્વાસોને ભવભવનું ભાથું…
સ્મરણોની હેલીને ક્યાં કોઈ લગામ એને નાથે તો બસ એક તું.

નગરના માનવી છીએ

સ્વર : નુતન સુરતી, અમન લેખડિયા
સંગીત : મેહુલ સુરતી
શબ્દ: મુકુલ ચોક્સી

નગરના માનવી છીએ, અમે આ ગામના નથી
હમેશા કામમાં છતાં, કશાય કામના નથી

અહીં વસંત વ્હાલની, અહીં ખુશી કમાલની
અહીં કદીક પાંગરે છે, મૌસમો ટપાલની

અહીં છે એ બધા કે જેની કોઇ ઝંખના નથી
અહીં છે એવું ભોળપણ, કે જેની નામના નથી

હ્રદયમાં એનું છે સ્મરણ, હવામાં એનું છે રટણ
ભલે મળું હજારને, મને ગમે બસ એક જણ

ભલે નથી નજીક પણ, એ સાવ દૂરના નથી
એ ચાહનાથી છે વધુ, ભલે એ ચાહના નથી

ગુરુવાર, 19 ફેબ્રુઆરી, 2009

પકડો કલમ ને કોઈ પળે

શબ્દ: મનોજ ખંડેરિયા
સ્વર: સોલી કાપડીયા
આલ્બમ: પ્રેમ એટલે કે

પકડો કલમ ને કોઈ પળે, એમ પણ બને
આ હાથ આખે આખો બળે, એમ પણ બને

જ્યાં પહોંચવાની ઝંખના વરસોથી હોય ત્યાં
મન પહોંચતા જ પાછુ વળે, એમ પણ બને

એવું છે થોડું છેતરે રસ્તા કે ભોમિયા
એક પગ બીજા પગ ને છળે, એમ પણ બને

જે શોધવામાં જિંદગી આખી પસાર થાય
ને એ જ હોય પગની તળે, એમ ૫ણ બને

તું ઢાળ ઢોલિયો, હું ગઝલ નો દીવો કરું,
અંધારું ઘર ને ઘેરી વળે, એમ પણ બને

બુધવાર, 18 ફેબ્રુઆરી, 2009

તને સાચવે પાર્વતી, અખંડ સૈભાગ્યવતી

ફિલ્મ: અખંડ સૌભાગ્યવતી
સંગીત: કલ્યાણજી-આણંદજી
સ્વર: દેવયાની પટેલ


તને સાચવે પાર્વતી, અખંડ સૈભાગ્યવતી
તને સાચવે સીતા સતી, અખંડ સૌભાગ્યવતી

માના ખોળા સમું આંગણું તેં મુક્યું
બાપના મન સમું બારણું તેં મુક્યું
તું તો પારકા ઘરની થતી, અખંડ સૌભાગ્યવતી

મંગળવાર, 17 ફેબ્રુઆરી, 2009

નૈને નૈન મળે જ્યાં છાના

ફિલ્મ: અખંડ સૌભાગ્યવતી
સંગીત: કલ્યાણજી-આણંદજી
સ્વર: મુકેશ, લતા મંગેશકર

નૈને નૈન મળે જ્યાં છાના,
થાયે બંને દિલ દિવાના.
તમને પારકા માનું કે માનું પોતાના..

નૈને નૈન મળે જ્યાં છાના,
વાતો હૈયાની કહેવાના.
તમને પારકા માનું કે માનું પોતાના..

વાગ્યા નજરોનાં તીર,
થયું મનડું અધીર,
શાને નૈન છૂપાવો ધુંધટમાં.

શરમાઈ ગઈ, ભરમાઈ ગઈ,
મેંતો પ્રીત છૂપાવી અંતરપટમાં,
મનમાં જાગ્યા ભાવ મઝાનાં,
જાણે થઈએ એકબીજાનાં,
તમને પારકા માનું કે માનું પોતાના..

મળે હાથમાં જો હાથ,
મળે હૈયાનો જો સાથ,
મને રાહ મળે મંઝીલની..

રહે સાથ કદમ હોય દર્દ કે ગમ,
દુનિયાથી જુદી છે સફર દિલની.
સાથે કોના થઈ રહેવાના,
કહી દો દિલનાં કે દુનિયાનાં,
તમને પારકા માનું કે માનું પોતાના..

સોમવાર, 16 ફેબ્રુઆરી, 2009

બે મત નથી એક જ મત છે


સ્વર: આશા ભોંસલે
સંગીત: અવિનાશ વ્યાસ

બે મત નથી એક જ મત છે કે આ સંસાર રમત છે;
જૂઠો જીતે ને સાચો હારે એવી બાજી જેનું નામ જગત છે.
બે મત નથી એક જ મત છે.....

ગોઠવાઇ ગઇ બાજી માં તે વિવિધ રંગની ગોટી;
કોઇ જીતીને થાય તવંગર કોઇ પહેરે લંગોટી;
હારે તોયે બમણું રમતા એવો બુરો મમત છે.
બે મત નથી એક જ મત છે.....

કાળવિંઝણે ઊડી જશે આ ગંજીફાનું ઘર;
ચાર દિવસના ચાંદરણાની એવી અવર-જવર;
એ જ જીતે સંસારના ગઢને જેણે જીત્યો વખત છે.
બે મત નથી એક જ મત છે.....

રોજ સૂરજનો દિવો સળગે સાંજ પડે બુઝાય;
પણ પ્રપંચ કેરો ખેલ ના ખૂટે રમત પૂરી ના થાય;
તન સમજે પણ મન ના સમજે મન એવું મરકટ છે.
બે મત નથી એક જ મત છે......

રવિવાર, 15 ફેબ્રુઆરી, 2009

ઝૂલણ મોરલી વાગી રે, રાજાના કુંવર



ઝૂલણ મોરલી વાગી રે, રાજાના કુંવર !
હાલો ને જોવા જાયેં રે
મોરલી વાગી રે, રાજાના કુંવર.

ચડવા તે ઘોડો હંસલો રે, રાજાના કુંવર,
પીતળિયા પલાણ રે. – મોરલી…..

બાંયે બાજુબંધ બેરખા રે, રાજાના કુંવર,
દસેય આંગળીએ વેઢ રે. – મોરલી…..

માથે મેવાડાં મોળિયાં રે, રાજાના કુંવર,
કિનખાબી સુરવાળ રે. – મોરલી…..

પગે રાઠોડી મોજડી રે, રાજાના કુંવર,
ચાલે ચટકતી ચાલ્ય રે. – મોરલી….

ઝૂલણ મોરલી વાગી રે, રાજાના કુંવર !
હાલો ને જોવા જાયેં રે
મોરલી વાગી રે, રાજાના કુંવર.

શુક્રવાર, 13 ફેબ્રુઆરી, 2009

ઊંચી તલાવડીની કોર વેલેન્ટાઇનોત્સવ - 4

સ્વર : આશા ભોંસલે
સંગીત : અવિનાશ વ્યાસ

ઊંચી તલાવડીની કોર પાણી ગ્યા’તાં
પાણી ભરતાં રે જોયો સાહ્યબો

બોલે અષાઢીનો મોર પાણી ગ્યા’તાં
પાણી ભરતાં રે જોયો સાહ્યબો.

ગંગા જમની બેડલું ને કીનખાબી ઇંઢોણી
નજરું ઢાળી હાલું તો’ય લાગે નજરું કોની

વગડે ગાજે મુરલીના શોર, પાણી ગ્યા’તાં
પાણી ભરતાં રે જોયો સાહ્યબો.

ઊંચી તલાવડીની કોર પાણી ગ્યા’તાં
પાણી ભરતાં રે જોયો સાહ્યબો

ભીગી ભીગી જાય મારા સાડલાની કોર
આંખ મદેલી ઘેરાણી જાણે બન્યું ગગન ઘનઘોર

ના રહે આંખ્યુંનો તોર પાણી ગ્યા’તાં
પાણી ભરતાં રે જોયો સાહ્યબો

ગુરુવાર, 12 ફેબ્રુઆરી, 2009

જરા થોડી જગા તારા જીગરમાં દે : વેલેન્ટાઇનોત્સવ - 3

સ્વર : આશા ભોંસલે
સંગીત: અવિનાશ વ્યાસ

જરા થોડી જગા તારા જીગરમાં દે,
બડો અહેસાન થઇ જાશે

નહીં તો ખાલી દિલમાં
દિલના અરમાન રહી જાશે
બડો અહેસાન થઇ જાશે

નજરના એક ખૂણામાં જરી
જો બેસણું તુ દે
ભરી દે દમ મીઠો હરદમ
મને તારા ચરણમાં લે

ભલે બોલે કે ના બોલે
જીવન કુરબાન થઇ જાશે
બડો અહેસાન થઇ જાશે..

સૂરા ને સુંદરીની અહીં
બડી મહેફિલ જામી છે
બધુ છે અહીં સદા હાજર
છતાં એક દિલની ખામી છે

લૂંટી લે મન ભરી મહેબૂબ
જીગર મુસ્કાન થઇ જાશે
બડો અહેસાન થઇ જાશે

તારી આંખનો અફીણી : વેલેન્ટાઇનોત્સવ - 2


શબ્દ - વેણીભાઇ પુરોહિત
ફિલ્મ - દિવાદાંડી
સ્વર - દીલિપ ધોળકિયા, સોલી કાપડીયા

તારી આંખનો અફીણી, તારા બોલનો બંધાણી
તારા રૂપની પૂનમનો પાગલ એકલો (2)

આજ પીઉં દરશનનું અમૃત, કાલ કસુંબલ કાવો,
તાલ પુરાવે દિલની ધડકન, પ્રીત બજાવે પાવો,
તારી મસ્તીનો મતવાલો આશક એકલો… હે તારા રૂપની….
તારી આંખનો અફીણી….

પાંખોની પરખે પરબડી આંખો જુએ પીયાવો
અદલ બદલ તનમનની મૌસમ ચાતકનો ચકરવો
તારા રંગ નગરનો રસિયો નાગર એકલો…હે તારા રૂપની…
તારી આંખનો અફીણી….

ધીમી ધીમી પગલી તારી ધીમી કંઇક અદાઓ
કમર કરે છે લચક અનોખી રૂપ તણાં લટકાઓ
તારી અલબેલી એ ચાલનો ચાહક એકલો…હે તારા રૂપની…
તારી આંખનો અફીણી….

તું કામણગારી રાધા ને હું કાનો બંસીવાળો
તું ચંપા વરણી ક્રિષ્ન કળી હું કામણગારો કાનો
તારા ગાલની લાલી નો ગ્રાહક એકલો…હે તારા રૂપની…
તારી આંખનો અફીણી….

રૂપ જાય આગળથી પાછળ, જાય જુવાની વીતી,
પ્રીતવાવડી સદા છલકતી, જાય જિંદગી પીતી,
તારા હસમુખડાં ઝીલું છું ઘાયલ એકલો…હે તારા રૂપની…
તારી આંખનો અફીણી….

ઠરી ગયા કામણનાં દીપક, નવાં નૂરનો નાતો,
ઝલક ગઈ મન પામરતાની, નવી આરતી ગાતો.
તારી પાનીને પગરસ્તે ચાલું એકલો… હે તારા રૂપની…
તારી આંખનો અફીણી….

સોલી કાપડીયા

દીલિપ ધોળકિયા

દીલિપ ધોળકિયા(vocal)

મંગળવાર, 10 ફેબ્રુઆરી, 2009

એવું રે અજાણ્યું સગપણ સાંભર્યું : વેલેન્ટાઇનોત્સવ - 1

શબ્દ: માધવ રામાનુજ
સ્વર: કવિતા કૃષ્ણમૂર્તિ
સંગીત: શ્યામલ-સૌમિલ મુન્શી
આલ્બમ: હસ્તાક્ષર


એવું રે અજાણ્યું સગપણ સાંભર્યું,
સોણલાની વાડી ઝાકમઝોળ;
કોણ રે ચૂંટે ને કોણ ચપટી ભરે;
મઘમઘ સુવાસે તરબોળ,
સગપણ સાંભર્યું.

ક્યાં રે કિનારો, ક્યાં રે નાંગર્યા
નજર્યુંના પડછાયા આમ;
અચરજ ઊગી ઊગી આથમે
પછીયે પથરાતું નામ,
સગપણ સાંભર્યું.

ઝાકળ સરીખું ઝલમલ બારણું,
પગલે પાંપણનું ફૂલ;
એક રે હોંકારે ઉઘડે આગળા
ઓળઘોળ આયખાનું મૂલ;
સગપણ સાંભર્યું

મારી આંખે કંકુના સૂરજ આથમ્યા

શબ્દ : રાવજી પટેલ
સ્વર : ભુપિન્દર, રાસબિહારી દેસાઇ

મારી આંખે કંકુના સૂરજ આથમ્યા ….
મારી વે’લ શંગારો વીરા, શગને સંકોરો
રે અજવાળાં પહેરીને ઊભા શ્વાસ!
મારી આંખે કંકુના સૂરજ આથમ્યા ….

પીળે રે પાંદે લીલા ઘોડા ડૂબ્યા;
ડૂબ્યાં અલકાતાં રાજ, ડૂબ્યાં મલકાતાં કાજ
રે હણહણતી મેં સાંભળી સુવાસ!
મારી આંખે કંકુના સૂરજ આથમ્યા ….

મને રોકે પંછાયો એક ચોકમાં;
અડધા બોલે ઝાલ્યો; અડધો ઝાંઝરથી ઝાલ્યો
મને વાગે સજીવી હળવાશ!
મારી આંખે કંકુના સૂરજ આથમ્યા ….

ભુપિન્દર

રાસબિહારી દેસાઇ

રવિવાર, 8 ફેબ્રુઆરી, 2009

મૌન કહો તો

શબ્દ : નિલેશ રાણા
સ્વર: સોલી કાપડીઆ
મૌન કહો તો એક શબ્દ છે, આમ જુઓ તો વાણી.
આભથી જુઓ બરફ પડે ને, પળમાં વહેતું પાણી.
જળની કુંડળી પરપોટામાં શાને જાય સમાઈ,
પત્થરમાંથી ઝરણું ક્યાંથી પ્રગટે એજ નવાઈ,
નદી સરોવર સમદર જળની જુજવી હોય કહાણી.
રેતી પર એક નામ લખું ને પવન ભુંસતો જાય,
જળમાં તારું નામ લખું તો તરંગમાં લહેરાય,
લઈ રહસ્યો પછી જિંદગી બેઠી ઘુંઘટ તાણી.

શનિવાર, 7 ફેબ્રુઆરી, 2009

અખિલ બ્રહ્માંડમાં એક તું શ્રીહરિ

સ્વર : ઉદય મઝુમદાર
શબ્દ : નરસિંહ મહેતા
સંગીત : નીનુ મઝુમદાર

અખિલ બ્રહ્માંડમાં એક તું શ્રીહરિ,
જુજવે રૂપ અનંત ભાસે;
દેહમાં દેવ તું, તેજમાં તત્વ તું,
શૂન્યમાં શબ્દ થઇ વેદ વાસે …
અખિલ બ્રહ્માંડમાં …

પવન તું, પાણી તું, ભૂમિ તું ભૂધરા,
વૃક્ષ્ર થઇ ફૂલી રહ્યો આકાશે;
વિવિધ રચના કરી અનેક રસ લેવાને,
શિવ થકી જીવ થયો એ જ આશે …
અખિલ બ્રહ્માંડમાં …

વેદ તો એમ વદે શ્રુતિ-સ્મૃતિ સાખ દે,
કનક કુંડલ વિષે ભેદ ન્હોયે;
ઘાટ ઘડિયા પછી નામરૂપ જૂજવાં,
અંતે તો હેમનું હેમ હોયે …
અખિલ બ્રહ્માંડમાં …

ગ્રંથ ગરબડ કરી, વાત નવ કરી ખરી,
જેહને જે ગમે તેને પૂજે;
મન-વચન-કર્મથી આપ માની લહે,
સત્ય છે એજ મન એમ સૂઝે…
અખિલ બ્રહ્માંડમાં…

વૃક્ષમાં બીજ તું, બીજમાં વૃક્ષ્ર તું,
જોઉં પટંતરો એ જ પાસે;
ભણે નરસૈયો એ જ મન તણી શોધના,
પ્રીત કરું પ્રેમથી પ્રગટ થાશે …
અખિલ બ્રહ્માંડમાં…

શુક્રવાર, 6 ફેબ્રુઆરી, 2009

જુઓ લીલા કૉલેજમાં જઇ રહી છે

ગઇ કાલે 'લીલા ગીતો'થી પ્રખ્યાત થયેલા ગઝલકાર આસિમ રાંદેરીનું 105 વર્ષની જૈફ વયે દુઃખદ નિધન થઇ ગયું.
સ્વર્ગસ્થને ભાવાંજલિ રૂપે તેમની ખ્યાતનામ રચના મનહર ઉધાસના સ્વરમાં:

પ્રણયના પાઠ હું ભૂલ્યો છું જ્યાંથી, ચાહું છું કે કરી લઉં યાદ ત્યાંથી ;
છતાં મારા જીવનનું આજ 'આસિમ', વરસ બાવીસમું તે લાવું ક્યાંથી?

જુવાની મહોબ્બતના દમ લઇ રહી છે, મને દિલની ધડકન ખબર દઇ રહી છે;
પ્રણય રૂપ ના રંગ જોવાને માટે, બધાની નજર એ તરફ થઇ રહી છે.
જુઓ લીલા કોલેજમાં જઇ રહી છે.

કમલ જેવાં કરમાં એ પુસ્તક ઉઠાવી, પ્રણય ઊર્મિઓ મનની મનમાં સમાવી;
મનોભાવ મુખ પર ન દેખાય તેથી, અદાથી જરા ડોક નીચી નમાવી;
મને અવનવી પ્રેરણા દઇ રહી છે, જુઓ લીલા કોલેજમાં જઇ રહી છે.

છે લાલી માં જે લચકતી લલિતા, ગતિ એવી જાણે સરકતી સરિતા;
કલાથી વિભૂષિત કલાકાર માટે, કવિતા જ સુંદર બનીને કવિતા;
પ્રભુની પ્રભા ની ઝલક દઇ રહી છે, જુઓ લીલા કોલેજમાં જઇ રહી છે.

ન સુરમો, ન કાજલ, ન પાવડર ન લાલી; છતાંય એની રંગત છે સૌ માં નિરાલી;
બધી ફેશનેબલ સખીઓ ની વચ્ચે, છે સાદાઇ માં એની જાહોજલાલી;
શું ખાદીની સાડી મજા દઇ રહી છે, જુઓ લીલા કોલેજમાં જઇ રહી છે.

સરળથી ય સરળ છે એની સરળતા, નથી શબ્દ સમજાવવા કોઇ મળતા;
લખું તોય લખતાં ન કાંઇ લખાયે, શમી જાય છે ભાવ હૈયે ઉછળતાં;
અજબ મારા મનની દશા થઇ રહી છે, જુઓ લીલા કોલેજમાં જઇ રહી છે.

ભલા કોણ જાણે કે કોને રિઝવવા, અને કોના દિલની કળીને ખિલવવા;
એ દરરોજ બે-ચાર સખીઓની સાથે, એ જાયે છે ભણવા કે ઉઠાં ભણવવા;
ન સમજાય તેવી કલા થઇ રહી છે, જુઓ લીલા કોલેજમાં જઇ રહી છે.

કોઇ કહે છે જાય છે ચિત્રો ચિતરવા, કહે છે કોઇ જ્ઞાન ભંડાર ભરવા;
કોઇ કેમ સમજે આ બાબતને ‘આસિમ’, અધુરાં પ્રણય પાઠ ને પૂર્ણ કરવા;
એ દરરોજ ભણતરનાં સમ લઇ રહી છે, જુઓ લીલા કોલેજમાં જઇ રહી છે.

ગુરુવાર, 5 ફેબ્રુઆરી, 2009

શાંત ઝરૂખે

શબ્દ - 'સૈફ' પાલનપુરી
સ્વર - મનહર ઉધાસ
આલ્બમ - અભિનંદન

શાંત ઝરૂખે વાટ નિરખતી રૂપની રાણી જોઇ હતી
મેં એક શહજાદી જોઇ હતી……

એના હાથની મહેંદી હસતી’તી, એની આંખનું કાજળ હસતું’તુ,
એક નાનું સરખું ઉપવન જાણે મોસમ જોઇ મલકતું’તુ.
એના સ્મિતમાં સો સો ગીત હતાં, એની ચુપકીદી સંગીત હતી,
એને પડછાયાની હતી લગન, એને પગરવ સાથે પ્રીત હતી.

એણે આંખના આસોપાલવથી, એક સ્વપ્નમહલ શણગાર્યો’તો,
જરા નજરને નીચી રાખીને, એણે સમયને રોકી રાખ્યો’તો.
એ મોજાં જેમ ઉછળતી’તી, ને પવનની જેમ લહરાતી’તી,
કોઇ હસીન સામે આવે તો, બહુ પ્યારભર્યું શરમાતી’તી.

તેને યૌવનની આશિષ હતી, એને સર્વ કળાઓ સિધ્ધ હતી,
એના પ્રેમમાં ભાગીદાર થવા, ખુદ કુદરત પણ આતૂર હતી.

વર્ષો બાદ ફરીથી આજે એ જ ઝરૂખો જોયો છે.
ત્યાં ગીત નથી, સંગીત નથી; ત્યાં પગરવ સાથે પ્રીત નથી.
ત્યાં સ્વપ્નાઓના મહેલ નથી, ને ઉર્મિઓના ખેલ નથી.
બહુ સૂનું સૂનું લાગે છે, બહુ વસમું વસમું લાગે છે.

એ ન્હોતી મારી પ્રેમિકા, કે ન્હોતી મારી દુલ્હન,
મેં તો એને માત્ર ઝરૂખે વાટ નીરખતી જોઇ હતી.
કોણ હતી એ નામ હતું શું? એ પણ હું ક્યાં જાણું છું?
એમ છતાંયે દિલને આજે વસમું વસમું લાગે છે,
બહુ સૂનું સૂનું લાગે છે…….


બુધવાર, 4 ફેબ્રુઆરી, 2009

ખુશબુમાં ખીલેલાં ફુલ હતાં

શબ્દ : 'સૈફ' પાલનપુરી
સ્વર-સંગીત : પુરુષોત્તમ ઉપાધ્યાય
આલ્બમ : ઇર્શાદ

ખુશબુમાં ખીલેલાં ફુલ હતાં
ઊર્મિમાં ડૂબેલાં જામ હતાં
શું આંસુ ભૂતકાળ હતો શું
આંસુનાં પણ નામ હતાં......

થોડીક શિકાયત કરવી'તી
થોડાંક ખુલાસા કરવા'તા
મોત જરા રોકાઇ જતે
બે-ચાર મને પણ કામ હતાં....

હું ચાંદની રાતે નીકળ્યો'તો
ને મારી સફર ચર્ચાઇ ગઇ
કંઇ મંજિલ પણ મશહૂર હતી
કંઇ રસ્તા પણ બદનામ હતા...

જીવનની સમી સાંજે મારે
ઝખમોની યાદી જોવી'તી
બહુ ઓછાં પાનાં જોઇ શક્યો
બહુ અંગત-અંગત નામ હતાં.....

થઇ રાખને જે બેઠાં છે
એ ‘સૈફ’ છે મિત્રો જાણો છો
કેવો ચંચલ જીવ હતો
કેવા રમતા રામ હતા.....

રવિવાર, 1 ફેબ્રુઆરી, 2009

મારી કોઈ ડાળખીમાં

સ્વર : પુરુષોત્તમ ઉપાધ્યાય, સોલી કાપડીયા
શબ્દ : અનિલ જોશી

મારી કોઈ ડાળખીમાં પાંદડા નથી
મને પાનખરની બીક ના બતાવો !

પંખી સહિત હવા ચાતરીને જાય
એવું આષાઢી દિવસોમાં લાગે,
આંબાનું સાવ ભલે લાકડું કહેવાઉં
પણ મારામાં ઝાડ હજી જાગે.

માળામાં ગોઠવેલી સળી હું નથી
મને વીજળીની બીક ના બતાવો !

એકે ડાળીથી હવે ઝીલ્યો ન જાય
કોઈ રાતી કીડીનોય ભાર !
એક પછી એક ડાળ ખરતી જોઉં ને થાય
પડવાને છે કેટલી વાર ?

બરફમાં હું ગોઠવેલું પાણી નથી
મને સૂરજની બીક ના બતાવો !

પુરુષોત્તમ ઉપાધ્યાય (આલ્બમ: ગુલમહોર)

સોલી કાપડીયા

પાગલ છે જમાનો ફૂલોનો


શબ્દ : 'શૂન્ય' પાલનપુરી
સ્વર : મનહર ઉધાસ

પાગલ છે જમાનો ફૂલોનો, દુનિયા છે દીવાની ફૂલોની
ઉપવનને કહી દો ખેર નથી! વિફરી છે જવાની ફૂલોની.

અધિકાર હશે કંઇ કાંટાનો એની તો રહીના લેશ ખબર
ચીરાઇ ગયો પાલવ જ્યારે છેડી મેં જવાની ફૂલોની.

ઉપવનને લૂંટાવી દેવાનો આરોપ છે કોના જોબનપર
કાંટાની અદાલત બેઠી છે લેવાને જુબાની ફૂલોની.

તું શૂન્ય કવિને શું જાણે એ રૂપનો કેવો પાગલ છે
રાખે છે હૃદય પર કોરીને રંગીન નિશાની ફૂલોની.

સૌંદર્યની ચાહતના પરદે, સૌંદર્યોની લૂંટો ચાલે છે:
ફૂલો તો બિચારા શું ફૂલે! દુશ્મન છે જવાની ફૂલોની.